Байқаудың теориялық кезеңі 25 сәуірде оқу орталығының компьютерлік сыныбында өтті. Қатысушылар 50 минут ішінде тест сұрақтарына жауап берді. Әр дұрыс жауапқа 0,1 баллдан есептелінді. Тесттен 3,5 немесе одан жоғары ұпай жинаған қатысушылар байқаудың практикалық кезеңіне жіберілді.

Практикалық кезең мамырдың 16 жұлдызында ұйымдастырылды. Қатысушылар К45/30 сорғы білігінің сызбасына сәйкес токарлық станоктарда оның кішірейтілген нұсқасын жасап шықты. Бұл ретте олар металл кесетін және өлшеу құралдарын пайдаланып, өнеркәсіптік және еңбек қауіпсіздігі талаптарына қайшы келмейтін жаңашыл тәсілдерді қолданды. Тапсырманы орындауға жалпы 60 минут берілді.

Практикалық тапсырманы бағалау кезінде жұмыстың орындалу сапасы, нормативтік уақытқа сәйкестігі, қауіпсіздік пен еңбекті қорғау талаптарының сақталуы, жұмыс орнының мәдениеті және киімі ескерілді.

Байқау нәтижесі бойынша бірінші орынды 8,33 ұпай жинаған токарь Сергей Владимирович Герасименко иеленді. Екінші орын 6,79 ұпаймен токарь Рүстем Ісембекұлы Имантаевқа бұйырды. Үшінші орынды 6,77 ұпай жинаған кең бейінді станокшы Данияр Қалқаманұлы Шапихов алды.

Бүгінде білікті токарьлер мен кең бейінді станокшылар еңбек нарығында жоғары сұранысқа ие. Біздің зауытта өз кәсіби шеберлігін дәлелдеуге және біліктілігін арттыруға дайын тек жоғары деңгейлі жұмысшылар еңбек етуде.

«ПМХЗ» ЖШС-ның Жұртшылықпен байланыс жасау бөлімі

Фото – Вадим Бердников