Пресс-турдың негізгі мақсаты – қатысушыларды кәсіпорында өнеркәсіптік пайдалануға енгізілген атмосфералық ауаға шығарылатын ластаушы заттардың автоматтандырылған мониторинг жүйесімен (АМЖ) таныстыру болды. Аталған жүйе мұнайды бастапқы және терең өңдеу қондырғыларының түтін мұржаларында, сондай-ақ битум өндірісінде орнатылған. Пресс-тур барысында қатысушыларға түтін газдарының құрамын үздіксіз талдауды қамтамасыз ететін газ-талдағыштар мен хроматографтарды қоса алғанда, заманауи жабдықтардың жұмысы көрсетілді. Сонымен қатар, кәсіпорын мамандары өлшенетін көрсеткіштерді бақылау тәртібі және олардың «Қазақстан Республикасының қоршаған ортасының жай-күйі мен табиғи ресурстары туралы ұлттық деректер банкі» ақпараттық жүйесіне автоматты түрде берілу тетігі туралы баяндады. Іс-шара қорытындысы бойынша қатысушылар ПМХЗ-ның жұртшылықпен және бұқаралық ақпарат құралдарымен өзара ынтымақтастыққа дайындығын білдірді, кәсіпорында заманауи экологиялық мониторинг жүйелерін енгізу бойынша жүргізіліп жатқан жұмыстарға оң баға берді. Соңында делегация өкілдері пресс-турды ұйымдастырушыларға және автоматтандырылған мониторинг жүйесінің жұмысымен тікелей өндірістік алаңда танысу мүмкіндігін ұсынғаны үшін зауыт басшылығына алғыстарын білдірді.
«ПМХЗ» ЖШС-нің қоршаған ортаны қорғау қызметі
Фото — Ирина Адылканова